Ikker idjen n wass senn iyet sen, mlaqan. Amezwar yus dd sikk ict tmurt, wussen si tmurt nniḍen. Iwa ikker idjen issten wenn nniḍen.
– May-d ac qqaṛen ?
– Nettc d bab n umɣu, ha i cekk ?
– Nettc d bab n udɣu. Kkren ffɣen beṛṛa n uɣṛem. Bab n umɣu, ul tuɣ iεlim leεwin. Bab n udɣu, tuɣ yisi maykk ala itec.
Ukk brid, bab n umɣu iqqim ireddza l wenn nniḍen ad as yuc ad itec. Yuc as. Ẓwan ammen, ammen al-d tcen qa maykk iεlem bab n udɣu. Ikker umàu, issufeɣ dd leεwin nnes. Ca-d mi yelluẓ, itec. Ameddukel nnes iqqim ireddza ɣres.
– Ha uc i-dd ad tceɣ.
– Aṛaḥ !
– Ha maɣer nettc d ac uciɣ mala tetced ?
– Cekk d bab n udɣu ; nettc d bab n umɣu.
– Iwa uc i-dd ukan day afuḥ ! lliɣ ttmettiɣ s laẓ
– Day mmet ! Sa cekk sḍiṛeɣleɣ !
– Maɣer ?
– Ac nniɣ ac nettc d bab n umɣu !
– Iwa ha sḍiṛɣel iyi ! Ikker yut i l uɣensu. Isdireɣl i. Teqqen yict tiṭṭ nnes. Iwa yuc as idjen n ufuḥ. Iqqim as jar tiɣmas. Inna-y-as bab n udɣu.
– Ha uc i-dd ad tceɣ ! Ac teqqend i-dd yict tiṭṭ yudu !
– Day metta ad ac qqneɣ tenn nniḍen !
– Iwa teqqend i-dd ya yict tiṭṭ, texsed ad i-dd teqqned ula-d tenn nniḍen ?
– Wah ! Metta texsed ad tetced, ad ac qqneɣ tiṭṭ nniḍen.
– Maɣer ul tekkwided i ṛebbi ?
– Lliɣ qqaṛɣ ac metta texsed, ad tetced ad ac qqneɣ tiṭṭ nniḍen !
– Iwa ha yy may texsed ! Ikker yuc as idjen n ulubbiz iqqn as tiṭṭ nniḍen. inna-y-as bab n umɣu
– Iwa ha uc i-dd ad tceɣ afuḥ !
– Aṛaḥ ! Ikker iṛwel. Idj i beṛṛa n uɣṛem, d aḍeṛɣal illuẓ. Iwa ihmel. Iẓwa ikkur, ikkur al-d iwwet iman nnes i tezdayt. Ineṭṭ dis. Yuley ajenna nnes, iqqim din. Ittɣeẓẓa tiṛedwin al iqqaṛ " Maɣer a ṛebbi, maykk yyiɣ ! Ac nettc d bab n umɣu !" Iqqim wahli illa day : ass, ittɣima adday n tezdayt, iḍ, iness ajenna nnes al idjen n wass isell ukk awal iqqaṛ as :
– Atan tiṛedwin tifusay n uyen n tezdayt ccanent ukk singel ! Wi zzisent issineglen idekkwel dd ittmatar ! Tiṛedwin nnes tiẓelmaḍin ccanent ukk sendu. Wi zzisent issendun itekkes aṭṭaṣ n tlussi ! Iɣill tuɣ ittirjit ! Iwa iqqim ittsella ukk uyen n wawal. Ikker ad iqqel. Day issingel s tṛeṭṭa tafuseyt, ṛeẓment tiṭṭawen nnes.
Ikk sad iẓwa, yisi akid s sent tṛedwin : tafuseyt d tẓelmaṭṭ. Iṭṭef abrid ikkur, ikkur al-d yaweḍ yict tmurt ajellid nnes d aḍeṛɣal. Inna-y-as ukk uyen n ujellid a t ijjujey. Ixes. Ikker issingl as s tṛeṭṭa tafuseyt, ṛeẓment tiṭṭawin nnes ; iyy as taṛeṭṭa taẓelmaṭṭ ukk sendu nnes ikkes aṭṭaṣ n tlussi. Qqimen ttasen dd ɣres midden si ca-d tamurt. Qaε tuɣ ijjujuyin. Ajellid immuter may d as iyyu unuji nnes, inna i tmeṭṭut nnes :
– Ass mi mmuɣ, ad tessilyem bab n umɣu i tma inuɣ ! Ussan, immet ujellid n uyen n tmurt. Kkren at tmurt rzan bab n umɣu ssilyen t d ajellid xef sen. Anday.

Ḍaṛi, mikk imɣeṛ niɣ iwser cṛa-n yiwden, ittwanɣa. D mmis ay t issufuɣen l uḍṛaṛ. Yittsi t ukk zgaw, mukud yawy i al tqiccewt n uḍṛaṛ ; iṛeẓm as ssyin, iẓwa. Babas, ittɣima din ad immet. Idjen n umullu, ikker idjen n uqeyyar ad issufeɣ babas. Yisi t. Ikk iwḍen zzat aḍṛaṛ, iqqim iḍeṣṣ uyen n uwessar.
Mmis, ibbexnuneḍ : "Manec ! Nettc sad nɣeɣ baba, netta, illa iḍeṣṣ !"
– Maɣer tḍeṣṣed a baba ? Nettc, sa cekk nɣeɣ ; cekk, tellid tḍeṣṣed ?
– Ih, a mmi ! Lliɣ ḍeṣṣeɣ xfec. Ammu aykk yyiɣ i baba. Cekk, tellid ttekked ammu i babac. Mmic sad ac iyy ula-d netta-y-ammu.
– Manec ?
– Wah, a mmi ! D ammu aykk illan. Assu d nettc, ayetca d cekk.
Iqqes mmis d imeṭṭawen. Yill al-d yaḥel. Ikkes babas sukk zgaw. Yiwy i l idjen n uqbun uṣbiḥ. Icn as may deg ala iqqim d may deg ala izdeɣ. Iẓwa uyen n umeẓẓyan. Cṛa-d ass, tuɣ ittawy as maykk ala itec d maykk ala isew s tufra danis ikkwed d ul tessnen warra n tmurt nnes maykk iyyu. Metta ssnen, an iffeɣ abrid : a t nɣen.
Ẓwan wussan, usen dd wussan. Iqqim ammen al idjen n usekkwas teqquṛ tmurt n uyen yiwdan. Tbica, ul tuɣi. Tiẓnin, ṛɣent. Qqimen i laẓ d fad. Yus dd usekkwas nniḍen. Tuɣ tbica. Uzzlen iɣeẓṛan. Tamurt, teqqim d tawṛaɣt : lid d aylas, lid d tizzizewt. Xsen midden ad cerzen, ul ufin imendi.
Ayn uqeyyar, ul yufi ula-d maykk ala yawey i babas. Iffeɣ idjen n wass ; yuley aḍṛaṛ ad iẓṛ awessar nnes. Yiweḍ zzates, inna-y-as, d imeṭṭawen tcuṛen tiṭṭawin nnes :
– Baba ! Tbica, tuɣ. Midden xsen ad cerzen, ul ufin imendi. Nella nekkwed i laẓ. Nettc ul ufiɣ maykk ala tetced. Inna-y-as babas :
– A mmi, sad tezzirrfed al uɣṛem aqbur mani yi tuɣ teẓẓaṛed ; ɣez din ad tafed imendi. An d mani t tuɣ nteffer.
Iẓwa mmis ittafey al-d yaweḍ. Iɣzu tamurt, yuf imendi. Yisi t. Issiwḍ i ikk at tmurt nnes. Kkren midden cerzen. Ayen n uqeyyar, ul itti babas. Cṛa-d ass, tuɣ ittawy as may zzeg ala isellek maxef meddjren. Imendi, ikker ; urtan, zzizwen. Tedwel dd tmurt n uyen n yiwdan am umezwar. Mejren midden, sṛewten. Kksen aṭṭaṣ n imendi. Tamiṛa nsen, teffeɣ dd d tameqqṛant. Kksen maykk ul kkisen si tella tmurt nsen.
Yict tikkellt, nnan imezdaɣ n uyen n uɣṛem ad yyen tameɣṛa tameqqṛant ukk qeyyar ten issufɣen si laẓ. Nnan as t. Ixes. Ukk mezwar, sstnen t f manec iyyu al-d yaf imendi. Inna-y-asen :
– Ad awim iniɣ, metta ad iyi tedjem ddreɣ. Nnan as :
– Manec ! Cekk, tessufeɣd anaɣ si laẓ d ukeṛker, necni a cekk nneɣ ! Siwel ! Ul tekkwed ! May texsed, ad ac t neyy. Issiwel. Inna-y-asen qa maykk iyyu d babas. Ẓwan uyen n yiwdan l uḍṛaṛ. Ssehwan dd ayen n uwessar; yyn-as tameɣṛa taqeṛḍalt. Day yuden aykk ssnen man ayen awessar. Sukk uden, llan ḥerrzen wi wesren. Anday.

At ukeṛkeṛ d iwdan ul tuɣ nessin aṛeṭṭal. Wi di sen ul neεlim maykk ala itec, iqqaṛ i ikk at tmurt nnes mukud isek takeṛkaṛt iyer dd xfes adlas, ikkeṛkeṛ. Iwa qqimen ammen aṭṭaṣ n wussan. Sent twacunin, tuɣ mdukulent. Ca-d ass tuɣ kkurent a dd ayment aman. Itninti, tuɣ msexsant qbala.
Idjen n umullu yict sukk uyen n tbeẓẓiwin, teḍεen f tmeddukelt nnes am ḍaṛi. Tuf it till.
– May cemm yuɣen ?
– Ul zemmreɣ a gidem ffɣeɣ !
– Maɣer ?
– Sad nekkeṛkeṛ ! Necni, ul nufi maykk ala ntec ! Llan ssnen zzis midden.
– Ul tekkwed ! Rεa da !
Teẓwa uyen n tewtemt l tiddart nnes. Tisi dd imendi ; tiwy as t. Ayen n wass uyment dd. L uyetca nnes, ikk mmutren midden babas n uyen twacunt idder, behḍen. Ssetnen t. Ufen d aṛeṭṭal ay zzeg qqimen at tiddart nnes ddren. Day yuden aykk ssnen midden aṛeṭṭal. Anday.

Idjen n wass, yict tɣerdayt txes ad tẓeṛ beṛṛa d midden ; teffeɣ sukk qbun nnes. Tebheḍ ukk jenna-y-aziza d yiwdan. Tsell ukk yaẓiḍ itedden. Tenna-y-as :
– Manswen cekk ?
– Mm ! Nettc, d ajellid Yaẓiḍ ! Qqel ikk id jujju inuɣ manec yyen ! ay xfes irru uyaẓiḍ. Day issusem yawkan yus dd ɣres idjen n urgaz iɣers as, issenw i.
Teqqim tɣerdayt tḍeṣṣ al teqqaṛ :
– Nettc, ifeɣ ajellid. Ad yureɣ manec xseɣ, ul tekkwdeɣ. Qa ifeɣ midden ! Tutef l tiddart n idjen n urgaz, teqqim ttett as imendi nnes. Ikk tetcuṛ tadist nnes, teqqim tṛekked al dd yas umuc̣c̣ itc it. Ameqqṛan, ul iqqiṛ netta d ameqqṛan. Anday.

Recueilli par Mehmoud Aleḥyan. Ikker uɣerda d tɣerdayt, idjen n wass, yyen amecli nsen ikk lemsi, ffɣen : aɣerda ad izdem, taɣerdayt ad tessired. Nnan wi zzaren l tiddart ad imḍey amecli, issexsey lεafit. Aɣerda, deɣya izdem. Idwel l tiddart nnes. Iṛẓem taqbuct ad imḍey, tuḍa-y-as dis tcacit nnes.
Yuẓẓeḍ s uɣenja a tt yisi, yuḍa-y-as. Issitef fus nnes ad irza-y-aɣenja, iqqim din ufus nnes. Inna a dd yisi fus nnes saεa yuḍa din qaε netta. I tedwel tɣerdayt l tiddart nnes ul tufi-y-aɣerda. Tenna " Axemma ad yili izeddem !" Tekker ad temḍey ula-d nettat. Tuf amecli nnes icnu, tessexsey xfes. Teqqim tettṛaεa metta yus dd urgaz nnes.
Iwa tuḥel i tmeṛεiwt, tuc i tnujiwin nnes ad tcent. Tcent. Tuc asent aysum. I teqqel ukk adday n teqbuct nnes, temmuter dis tcacit d uḍaṛ n uɣerda. Tenna i tnujiwin nnes :
– Rremt i-dd aysum n uɣerda inuɣ ! Iwa rrent as, day yict twessart tuɣ tetcu amur nnes. Tenna-y-as :
– A lalla ! Nettc tciɣ t. Metta ad am uceɣ afuḥ sukk ḍaṛ inuɣ...
Teqqel tɣerdayt maykk ala teyy ammen ad tessekker aɣerda nnes. Teffeɣ l teymart tenna-y-as : A taεεa, a taεεa ! Uc i-dd idjen n uzaff ! A zzis iniɣ argaz inuɣ ! Tenna-y-as teymart :
– Awy i-dd aylas ad am uceɣ zaff ! Tiweḍ l uyemmun tenna-y-as :
– A yemmun, a yemmun ! Uc i-dd aylas, aylas ! A t uceɣ i taεεa, i taεεa ! Ad i-dd tuc zaff ! A zzis iniɣ argaz inuɣ !
Inna-y-as uyemmun :
– Awy idd aman ad am uceɣ aylas ! Tezzirref l yiɣẓeṛ tenna-y-as :
– A yiɣẓeṛ, a yiɣẓeṛ ! Uc i-dd vva, vva ! A t uceɣ i yemmun, i yemmun ! Ad i-dd yuc aylas, aylas ! A t uceɣ i taεεa, i taεεa ! Ad i-dd tuc zaff ! A zzis iniɣ argaz inuɣ ! Inna-y-as yiɣẓeṛ :
– Awy i-dd tiwacunin ad i-dd ṛekḍent !
Teẓṛu tiwacunin, tenna-y-asent :
– A tiwacunin, tiwacunin ! Rwaḥemt ṛekḍemt ikk iɣẓeṛ ! Ad i-dd yuc aman ! A ten uceɣ i yemmun ! Ad i-dd yuc aylas, aylas ! A t uceɣ i taεεa, i taεεa ! Ad i-dd tuc zaff ! A zzis iniɣ argaz inuɣ ! Nnant as twacunin :
– Awy aɣ dd tarkasin ad am neṛked !
Teqqel l uxerraz tenna-y-as :
– Axerraz, axerraz ! Uc i-dd tarkasin, tarkasin ! A tent uceɣ i twacunin ! Ad ṛekdent ikk iɣẓeṛ ! Ad i-dd yuc aman ! A ten uceɣ i yemmun ! Ad i-dd yuc aylas, aylas ! A t uceɣ i taεεa, i taεεa ! Ad i-dd tuc zaff ! A zzis iniɣ argaz inuɣ ! Inna-y-as :
– Awy i-dd idjen n uydi !
Tessiwel d uydi, tenna-y-as :
– Ay aydi, ay aydi ! Uc i-dd idjen n ugzin ! A t uceɣ ukk xerraz ! Ad i-dd yuc tarkasin ! A tent uceɣ i twacunin ! Ad rekḍent ikk iɣẓeṛ ! Ad i-dd yuc aman ! A ten uceɣ i yemmun ! Ad i-dd yuc aylas, aylas ! A t uceɣ i taεεa, i taεεa ! Ad i-dd tuc zaff ! A zzis iniɣ argaz inuɣ ! Inna-y-as :
– Awy i-dd utcu !
Temmuter yict tmeṭṭut, tenna-y-as : –A tameṭṭut, tameṭṭut ! Uc i-dd utcu, utcu ! A t uceɣ ukk ydi ! Ad i-dd yuc agzin ! A t uceɣ ukk xerraz ! Ad i-dd yuc tarkasin ! A tent uceɣ i twacunin ! Ad ṛekḍent ikk iɣẓeṛ ! Ad i-dd yuc aman ! A ten uceɣ i yemmun ! Ad i-dd yuc aylas, aylas ! A t uceɣ i taεεa, i taεεa ! Ad i-dd tuc zaff ! A zzis iniɣ argaz inuɣ !
Tuc as tmeṭṭut utcu. Tuc i ukk ydi. Yuc as agzin ; tuc i ukk xerraz. Yuc as tarkasin, tuc int i twacunin. Ṛekḍent ikk iɣẓeṛ. Yuc as aman, tiwy in ukk yemmun. Yuc as aylas. Tiwy i i teymart. Tenna-y-as :
– Iwa, kkes zaff ! Tekkes zaff si tejlalt nnes. Taymart, tuɣ ttett aylas. Iwa teqqim day ttekkes izaffen. Taymart, tenna-y-as : –Awd cemm !
Taɣerdayt, teqqim day ttekkes. Iwa qa may dd tiwey teymart tinez ttett aylas, taɣerdayt tella ttekkes i d izaffen. Ttekkes, ttekkes, al-d as dd terru tajlalt nnes d taqellalt. Tekker teymart ttmenzeɣ yawka tṛetx it : temmut. Anday.

Yict tikkelt, ikεeb d wuccen tuɣ lluẓen. Nnan ad ffɣen l yidjen n iyṛan ammen ad acren lebṣel (aẓalim). Itnin, tuɣ ssnen ayen n iyṛan. Inna yikεeb ukk uccen :
– Cḥal ɣrec illan n tmusniyin ?
– Qa izaffen inuɣ d timusniyin.
– Nettc, tella ɣri day yict d uzgen.
Ẓwan, utfen l iyṛan. Uccen amelluẓ, ijnu i tmurt itett. Ikεeb, ca-d mikk itcu, ikker, iqqel metta yutef d uqbun n terga. Ammen, ammen al-d sellen i bab n iyṛan. Ikεeb, iṛwel d uqbun. Uccen irza ad iffeɣ d uqbun, ul izmir : tuɣ itcu-y-aṭṭaṣ. Tessuf tdist nnes.
– Iwa ssufeɣ iman nnec ! Tennid qa izaffen nnec d timusniyin !
– Ul zmireɣ. Ini yi-dd manec ala yyeɣ.
– Tessend a dadda, nettc tella ɣri yict d uzgen, anday. Cekk, tεelmed aṭṭaṣ n tmusniyin !
– Ṛeḍl i-dd may zzeg ala ffɣeɣ !
– Ad ac ṛedleɣ azgen n tmusniyt. Tessned may sad teyyed ! Qqen tiṭṭawin nnec, teyyed tinsa nnec l ujenna.
Mi dd yutef ukerraz ad iɣill temmud, a cekk izerr. Cekk, ṛwel ! I dd yutef bab n iyṛan, yuf uccen i tmurt issuf. Iɣill an iqqujjeε. Yisi t issufɣ i sikk iyṛan nnes. Day iṛeẓm as yawkan ikker ittazzel al iḍeṣṣ f ukerraz. Inna-y-as uyen n urgaz :
– Nnit a cekk ṭṭfeɣ ad ac ccneɣ.
Iẓwa wuccen. Ukk brid nnes, immuter idjen n urgaz tuɣ inyu taserdunt. Immuter udi n urgaz, iqqim isridul. Iyyu iman nnes iqṛed. Ikk yiweḍ zzat bab n tserdunt, inna-y-as :
– Ay tɣul ac ! Ssiwḍ iyi l tenwalt inuɣ ! Lliɣ qeṛḍeɣ, ul zemmreɣ ad yureɣ. Ukk mezwar, yuyyey urgaz. Ukk nekkaṛu, isseny i. Ẓwan, ṭṭfen abrid.
Ayen n urgaz, iṭṭeṣ s uzuzen n tyuri n tserdunt. Uccen, immuter tiṭṭawin n urgaz qqnent, yuẓẓed l tεukkatin n wuddi. Ca-d mikk iftec yict, isew udi nnes, issuf it amzun tella tetcuṛ. Ul idji ula-d yict itcuṛen. I tiweḍ tserdunt zzat tanwalt n wuccen, inna ukk rgaz :
– Atan iwḍeɣ. Kker ! Nettc, sad hwiɣ.
Bedden ; ihwa wuccen. Bab n tserdunt, iṭṭef abrid l tmurt nnes d warra nnes. Yiweḍ zzat tiddart nnes. Ffɣen ɣres warra nnes. Inna-y-asen :
– Kkset ayen n tεukkatin n wudi si tserdunt, tella tuḥel ! Kkren uyen n warra yyen may d asen inna baba tsen. Ca-d tenn fetcen tneffeṛ xef sen. Qa tcuṛent s waḍu.
– Man ayu a baba ?
– Manec ?
– Tiweyd aɣ dd udi niɣ aḍu ?
– Ah ! D uccen n ubrid aykk iyyen tiyti-yu ! Ssɣed a taserdunt !
Afey, zzirref yam al zzat tanwalt dey neṛẓem ukk uccen. Ṣṛeε din ! Awey dd uccen idder niɣ a cemm nɣeɣ ! Teẓwa tserdunt al tma ɣer tt yuzen bab nnes. Teṣreε din. Teyyu iman nnes temmut. Teqqim ammen al dd teffeɣ tuccent si tenwalt nnes. Teqqel dis ; tenna ukk uccen :
– Tella tesbilliw tserdunt !
Inna-y-as :
– Hic ! Tella temmut. Asses tajlalt inuɣ d tenn nnes a tt ssufɣeɣ l beṛṛa ! Tuɣ as awal tmeṭṭut nnes. Ikk tusses tijulal nsen, tekker tserdunt tbedd. Teṛwel zzis l bab nnes. Tuccent, teqqes d imeṭṭawen al teqqaṛ : "Nettc, qqaṛɣ ac tella tesbilliw ; cekk teqqaṛḍ i-dd ul telli tesbilliw !"
Teṭṭef tserdunt abrid. Ca-d mi tufey afuḥ teẓẓeṛmeḍ f wuccen. Netta, ca-d mikk yuɣ tiyti, yini "Allah" al-d awḍen l tiddart n urgaz. Ikker ifetc asen tissast nsen. Iṭṭef uccen, inna-y-as :
– Ha maɣer qa s tṣebḥi gidec yyiɣ, cekk, tucerd iyi ? Icekkl i, yisi dd axedmi, iẓemḍ i. Inekḍ as qaε ilem nnes. Iqqim issekfus as tisent d tfelfelt.
Ikk yuḥel, issekker taserdunt a t tessiweḍ l tenwalt nnes. Tisi t tserdunt, teẓwa ṭṭabadeg, ṭṭabadeg, al tenwalt n wuccen. Tṛeẓm as. Nettat tedwel l id bab nnes. Uccen, iqqim ittwezwez al itteṛqiqif. Ffɣen warra nnes. Ufen t ammen. Ssitfen t l jaj n tenwalt ; ɣillen an baba tsen tuɣ iqṛef. Kkren yyn as imuɣad ammen ad izzi. Netta, ikk izzi, iqqim ississiy ayen n wudi iswu ukk mezwar. Arra nnes, mmutren udi, kkren tellɣen t al ssehruruyen. Yuden iqquṛ ɣeẓẓen t. Anday.

Idjen n wass n laẓ d tɣaṛt, ikker uyṛaḍ iffeɣ agd wuccen d yinsi ad ṭṭfen maykk ala tcen. Ẓwan, ttafyen, ttafyen al-d awḍen iɣeẓṛan. Mmutren idjen n uɣyul. Ṭṭfen t. Qqimen i tmurt. Xsen ad as ɣersen, bḍan t. Issekker uyṛaḍ uccen, inna-y-as:
– Bḍa-y-aɣ dd, cekk ay uccen !
Ikker wuccen ibḍa-y-asen. Yuc asen, i ca-d idjen, amur nnes. Ayṛaḍ, ikker ittmenzeɣ. Inna-y-as :
– Manec ! Nedwel dd d tuta ! Axemma, ul teɣṛid cay ? Day issusem yawkan yuẓẓeḍ ɣres s waccaren nnes. Ixeṛw as alli nnes; iyr i i tmurt. Uccen, iqqujjeε. Inna uyṛaḍ ikk insi :
– Bḍa-y-aɣ dd, cekk tessned !
Ikker yinsi ibḍa ula-d netta s imuren am imezwar. Inna ukk yṛaḍ :
– Aɣ ac a dadda ! Wu, i cekk ! d wu, i cekk ! atan ula-d wu, i cekk ! Inna-y-as uyṛaḍ :
– Cekk, tessned ! Axemma, teɣṛid ! Mani teɣṛid ?
– Nettc a dadda, ɣṛiɣ ukk xerbic dey ttwaxṛawen id walli. Ay xfes irru yinsi. Anday.

Idjen n wass, insi tuɣ imdukul d wuccen. Xsen ad acren mala tcen : itnin, tuɣ lluẓen. Ffɣen. Mmutren idjen n uṣeṛṛaḥ (ameksa). Ucern as idjen n wufric ameqqṛan. Yisi t wuccen l tenwalt nnes. Iqqen taflewt f yinsi. Idju t i beṛṛa.
Uccen, iɣres ukk ufric. Iqqim i jaj n tenwalt nnes. Insi, iqqim iqqaṛ as si beṛṛa :
– Uc i-dd wenn iteqqsen ikk lemsi !
– Dej iyi xfec !
– Uc i-dd wenn iccuffuten ikk lemsi !
– Dej iyi xfec !
– Uc i-dd wenn iẓẓinẓiṛen ikk lemsi !
– Dej iyi xfec !
– Uc i-dd day ilem nnes !
– Aɣ ac !
Yuc as ilem n wufric. Iṭṭf i yinsi. Yisi yict teɣrit. Iyyu iman nnes d bab n wulli ; iqqim ittcat ikk ilem n wufric. Cad mikk yutu tiyti, iẓga "Ay ! Maɣer d nettc ? Ac d wenn illan i jaj n tenwalt !" Iwa day tiyti, sent, isell wuccen. Ikkwed. Tuɣ iɣill d aṣeṛṛaḥ. Iṛwel. S tiwdi u-lli sa dd idwel al yiḍ.
Insi, netta, yutef l tenwalt n wuccen. Iqqen taflewt, itcu ufric. Iṭṭef ilem nnes, ifeqṛ i. Irru t id am tbuṣeyyart. Uccen, yuḥel, idwel ad yatef l tenwalt nnes. Yuf it teqqen. Issen d insi ay dis tuɣ yutfen. Inna-y-as :
– Uc i-dd wenn iteqqsen ikk lemsi !
– Ammen tennid llu !
– Uc i-dd wenn iccuffuten ikk lemsi !
– Ammen tennid llu !
– Uc i-dd wenn iẓẓinẓiṛen ikk lemsi !
– Ammen tennid llu !
– Uc i-dd day ilem nnes !
– Aɣ ac ! Izerr as t. Uccen, tuɣ iɣill sad yaf ilem am umezwar ; saεa yuf i am tbuṣeyyaṛt. Iẓwa wuccen iccuccen. Idjull ad iṭṭef insi tikkelt nniḍen. Anday.

Ikker idjen n wass wuccen iffeɣ l yinsi inna-y-as :
– Manec tennid metta necrez imendi s senn iyet neɣ ? Assu, tella tbica !
Irru xfes yinsi :
– Ay uccen, ul zemmerɣ agidc cerzeɣ. Nettc d ameẓẓyan ; cekk d ameqqṛan. Manec sad neyy i beṭṭu mi nemjer ?
– Hic ! maɣer tekkwded ?
– Iwa, manec ?
– Ufiɣ ! Tessned manec ! Sad necrez, nemjer. Mi nesseṛweṭ, ad nebḍa.
– Cekk, tellid tettjewwqed ! Manec sad neyy i beṭṭu ?
– Sad neyy tamzazzart. Wenn izzaren l unṛaṛ ad yisi imendi.
– Iwa manec sad yyeɣ ? Nettc, tinsa inuɣ d timeẓẓyanin ; ul zemmerɣ ad afyeɣ am cekk. Texsed ad iyi tezzared ! Cekk, day idjen n uṣurif ad tawḍeḍ anṛaṛ !
– Hic ! Cekk, d ameẓẓyan, ad tzemred ad tafyed. Day ul tekkwed ! Nettc, d ameqqṛan d amiẓay. Ukk nekkaṛu, ffɣen, cerzen. Qqimen al ikk yiweḍ imendi, mejren t.
Iwyen t l unṛaṛ, fesren t dis ammen ad iqqaṛ i tfuyt. Yuden icnu, ẓṛen anṛaṛ ; nnan ad yyen tamzazzart l uyetca nnes, mi dd tenqeṛ tfuyt. Ẓwan l tidrin nsen.
D iḍ, ikker yinsi issufeɣ arra d tmeṭṭut nnes. Issers in i tmewwin tuffirin idisan n ubrid. Tameṭṭut nnes, idj it zzat anṛaṛ.
I dd tuley tfuyt, iffeɣ yinsi l wuccen ammen ad azzlen. Uzzlen. Uccen, tuɣ inna sad izzar danis ameddukel nnes d ameẓẓyan.
« Idjen, senn, azzel ! » Ufyen. Uccen tuɣ iḍeṣṣ. Iɣill sad izzar. Iẓwa ammen al-d immater insi zzates.
– Manec ay uccen day yudu ay dd tiwḍed ? Uccen, iɣill d insi. Netta, ul issin mmis n yinsi.
– Ah, insi ittafey ! Aykk inna wuccen jaṛ as d yiman nnes. Iṭṭef abrid ittafey ujaṛ n umezwar.
– Hic, mani tellid ay uccen ? D insi nniḍen aykk issiwlen.
– Iwa ay insi, nniɣ a cekk djeɣ ad tazzled ; cekk d ameẓẓyan. Tuɣ yyiɣ ac ukan asul.
– Afey !
– Ad iyi tezzared ? Hemm... !
Iẓwa wuccen inekkeḍ abrid. Iɣill an insi illa deffres. Ikk tuɣ sad yaweḍ anṛaṛ, immuter tinsitt. Iɣill d insi. Tenna-y-as
– Zzareɣ cekk, a dadda uccen ! Imendi, inuɣ !
Iẓwa wuccen iccuccen. Idjull ad iṭṭef insi tikkelt nniḍen. Anday.

Idjen n usekkwas, tuɣ aṭṭaṣ n tbica. Uccen d yinsi xsen ad cerzen. Ffɣen, ẓṛen tamurt. Ẓẓan ẓṛuḍeyya.
Qqimen al dd tyem, ffɣen a tt ẓṛen. Mmutren tamiṛa nsen d tameqqṛant, nnan ad qqimen al uyetca nnes ammen a tt kksen.
Ammen aykkyyen : i talya n tfuyt, kkren. Iwḍen l iyṛan. Ul ufin manec ala yyen i beṭṭu.
Inna yinsi ukk uccen : "Nettc, ad isiɣ adday ; cekk, isi-y-ajenna."
Kksen ẓṛuḍeyya nsen. Insi yisi-y-adday ; iẓwa iḍeṣṣ. Uccen yisi-y-ajenna ; yuf i day d tyuya. Iẓwa ittmenzeɣ. Inna-y-as : "Nnit ! Al tikkelt nniḍen !"
Mullu nniḍen, xsen ad cerzen imendi. Cerzen t. Ẓwan. Al idjen n wass, nnan ad mejren. Uccen, iɣill am umezwar. Iɣill ẓṛuḍeyya am imendi. Inna ikk insi :
– Assu, nettc, ad isiɣ adday ; cekk, isi-y-ajenna !
Inna-y-as yinsi : Wah a dadda ! icnu may tennid aṭṭaṣ, aṭṭaṣ !
Ffɣen l wurtan ad mejren. Insi, ikkes ajenna n imendi, iẓwa iḍeṣṣ am umezwar. Uccen, iqqim iqqaz tamurt. Yuf day call d iẓewṛan. Iẓwa wuccen iccuccen. Idjull ad iṭṭef insi tikkelt nniḍen. Anday.