Ul ttxemma

Ul ttxemma, ul terra l wul : mta yeẓwa l Fṛanṣa, a dd idwel.

Iaḍ it lḥall s urgaz nnes : day mi dd yus yur, ad idwel.

Day tthenna, argaz illa yxes cemm.

La ya wl iεlim ul, a t id iṛḍel.

Mta y tsa tṛabbid myat gṛam, netta yella yṛabba xfem aṛḍel.

Tiwy t id lweqt ad ieṛṛeb, a dd infeq, a dd imewwel.

Tenn yiwyen zufrey day ad teṣbeṛ.

Mar may xef tu tεewwel ?

Argaz mta yexṭeṛ i lefjer, aεla yuf a dd idwel mi yzewwel.

Aεla w-lli d lmall, may sad iεceq ḥedd i tmuṛa n udfel ?

Wi sad inḍew l tenn ixes, u ss iterri lḥiḍ ula yerr i wesfel.

Ssenduq dg illa ẓẓehṛ inux, tlata n llewyat i leqfel.

Wenn xf iḥeṛṛ gṛenlezal, wa mar h ad ieẓẓ lfelfel.

Ajeεmey mta tfaṛqed t si yemmas, ḥḍa ss idjen n wass, ad ijfel.

Utcu wl issiliy, ul issiliy i seksu wen neεlim aseqfel.

Waxxa d awessar irza leεmart, u-lli cay d lεib mtanak ircel.

Ccbab n wassu, cḥal d ameεgaz.

Aεla yuf bisklit la mi sa dd inel.

Wa ṛeẓm aṭṭawen, arc axuc, teḥḍid lana si cṛa n unusfel.

Tamemt lḥuṛṛa, amεla teshel, ad ili ytekk it yizi, iyy it uẓeṛmel.

Qaε ufric iḥḍan, tennid ad injeḥ ;
awed εamayn aykk iḍubel.